Sorry, you need to enable JavaScript to visit this website.

Нашыя сацсеткi

instagram telegram twitter

Асабістая лекарка Лукашэнкі стала ўладальніцай сеткі аптэк

Асабістая лекарка Аляксандра Лукашэнкі Алена Казак стала ўладальніцай сеткі аптэк у Беларусі.

 

KAZAK

Алена Казак (крайняя злева) на вечарынцы Antiage Clinic. Крыніца: Інстаграм

 

Як даведалася «Бюро», у жніўні 2024 года кампанія «Лігматон», якой раней валодалі Георгій Тапузідзіс і ягоная маці Галіна Пятровіч, была перааформленая на Алену Казак. Дзякуючы «Кіберпартызанам» мы змаглі высветліць, што асабістая лекарка Лукашэнкі працаўладкаваная ў кампаніі з ліпеня 2024 года.

Георгій Тапузідзіс – сын буйнога беларускага бізнэсоўца і «кашалька» Лукашэнкі Паўла Тапузідзіса.

 

Павел Тапузідзіс разам са сваім бізнэс-партнёрам Віктарам Пятровічам кантралюе «Тытунь-Інвест», развівае сетку гандлёвых цэнтраў і гіпермаркетаў «Карона», а таксама звязаны з тытунёвай вытворчасцю і іншымі буйнымі бізнэс-актывамі ў Беларусі.

Першапачаткова новая ўладальніца была пазначаная ў дадзеных кампаніі як Алена Уладзіміраўна Казак. Мы не ведаем, ці было гэта зроблена наўмысна або памылкова, аднак пазней імя па бацьку памянялі. Недзе ў перыяд паміж лютым 2025 года і жніўнем 2026 года Алена Казак ператварылася з Уладзіміраўны ў Георгіеўну. Пры гэтым запіс пра структурныя змены кампаніі не ўносіўся, а мяркуючы па актуальнай выпісцы, менавіта асабістая лекарка Лукашэнкі валодае аптэкамі «Лігматон» са жніўня 2024 года. Дырэктаркай фірмы, як і раней, засталася Галіна Пятровіч, маці Георгія Тапузідзіса.

 

Кампанія «Лігматон» валодае сеткай аптэк ва ўсёй Беларусі, а таксама ўдзельнічае ў дзяржаўных тэндарах на пастаўку разнастайных медыкаментаў. Выручка кампаніі ў 2025 годзе склала 83,6 мільёна рублёў, а чысты прыбытак 2,79 мільёна.

 

Раней «Бюро» здолела даведацца, што яшчэ адна фаварытка Аляксандра Лукашэнкі звязаная з кампаніяй «Лігматон». З ліпеня 2024 года Марыя Васілевіч, былая дэпутатка, лічыцца там вядучай спецыялісткай па камерцыйнай дзейнасці.