Новыя беларускія

Віктар Шэйман адбудаваў цэлую бізнэс-імперыю, заснаваную на кантрабандзе і шэрых схемах. Але наўпрост памочнік і даўні паплечнік Аляксандра Лукашэнкі нічым не валодае.

У нашых матэрыялах і матэрыялах калег усплывалі прозвішчы давераных мэнэджараў Шэймана – браты Яўген і Юрый Жоўнеры, Аляксандр Раманоўскі і Антон Новік, Сяргей і Таццяна Аношкі.

Але ў такіх гісторыях заўсёды не хапала нагляднасці. Сёння мы прыадкрыем заслону таямніцы і больш падрабязна раскажам вам пра мужа і жонку Сяргея і Таццяну Аношкаў. Яны працуюць у «абойме Шэймана» з 2010-х гадоў і актыўна ўдзельнічаюць у «сямейных» схемах Лукашэнкі. І таму могуць дазволіць сабе ў Беларусі і за яе межамі сапраўднае лакшары-жыццё: дарагія ўпрыгажэнні і адзенне от-куцюр, адпачынак за сотню тысяч долараў, навагоднюю ноч на закрытым канцэрце Кайлі Міноўг. І гэта далёка не ўсё.

Вы можаце падтрымаць нашую працу і расследаванні, стаўшы падпісчыкам на Patreon

ALL INCLUSIVE

Дубай – гарачы і шалёна дарагі. Самыя багатыя людзі прыязджаюць сюды ў пошуках забаў, раскошы і экстрэмальнага люкса. Тут, на гламурным востраве Палм-Джумейра, велічна ўзвышаецца сімвал Дубая – знакаміты гатэль Atlantis The Palm, будаўніцтва якога абышлося ў 1,5 мільярда долараў.

Гатэль Atlantis The Palm, Дубай. Крыніца: wikipedia.org

Візітныя карткі рэзорта – найбуйнейшы ў свеце аквапарк Aquaventure, унесены ў Кнігу рэкордаў Гінэса, і акіянарыум The Lost Chambers, які налічвае больш за 65 000 падводных марскіх жывёл. На тэрыторыі гатэля знаходзяцца 15 рэстаранаў, 2 з іх адзначаныя зоркай Michelin. Сярод гасцей Atlantis The Palm былі заўважаныя амерыканская актрыса Кім Кардаш’ян, спявачка Джэніфер Лопес... І беларуская бізнэсвумэн Таццяна Аношка.

У пярэдадзень новага, 2023-га, года яна пахвалілася на сваёй старонцы ў інстаграме, што надыходзячы год сустракае пад акампанемент сусветнай суперзоркі – аўстралійскай спявачкі Кайлі Міноўг. Кульмінацыяй ночы стаў дзесяціхвілінны залп феерверкаў.

Сапраўды, у тую навагоднюю ноч поп-выканаўца стала хэдлайнеркай гала-вячэры якраз у Atlantis The Palm. Вечарынка пачалася з канапэ і шампанскага, затым гасцям падавалі мноства страў з раскошнага шведскага стала: ад лобстараў і ікры да жывых сушы і дэсертаў ручной працы. Частавалі гасцей не толькі марскімі далікатэсамі, але і вытанчаным французскім шампанскім Dom Pérignon – адпаведнае фота мы таксама знайшлі ў інстаграме Таццяны Аношкі.

Таццяна Аношка на канцэрце Кайлі Міноўг у Дубаі (снежань 2022 года). Крыніца: інстаграм-акаўнт Таццяны Аношкі

Цана за бутэльку Dom Pérignon Luminous з зіхоткай этыкеткай стартуе ад 250 € і можа дасягаць 9200 €. Імаверна, алкаголь – гэта камплімент ад установы і яго кошт ужо ўваходзіць у дэпазіт, які трэба было аплаціць за ўдзел у гэтай грандыёзнай тусоўцы. Самы «бюджэтны» з прапанаваных варыянтаў пасадкі для дарослага – 1600 $ з чалавека.

На суму, якую Таццяна Аношка патраціла за адзін вечар, сярэднестатыстычны беларус можа карміць сваю сям’ю без малога пяць месяцаў. Адкуль у непрыкметнай беларускай бізнэсвумэн такія грошы?

ФІНАНСІСТКА ШЭЙМАНА

Таццяна Аношка – важны чалавек у «групе кампаній» «Алексвіт». Чым жа вядомы гэты бізнэс-холдынг? Мы знайшлі як мінімум пяць дзейных кампаній, якія ўваходзяць у групу «Алексвіт». Яны займаюцца мытным афармленнем, лагістыкай, дапамагаюць абыходзіць санкцыі і ўдзельнічаюць у паралельным імпарце.

У першую чаргу гэта аднайменная кампанія ТАА «Алексвіт лтд» – буйная лагістычная фірма з выручкай у сотні мільёнаў рублёў. Яна працуе па разнастайных шэрых схемах для абыходу санкцый, рээкспарту і паралельнага імпарту.

Схема першая – фірма дапамагае абыходзіць санкцыі праз Турцыю, гэта адкрыта напісана на сайце. Паслуга называецца «Зборныя грузы»: Еўропа – Турцыя – Расія».

Схема другая – паслугі мытнага афармлення аўтазапчастак, што прыбываюць з ЕС, ЗША, краін Паўднёва-Усходняй Азіі, з наступнай рэалізацыяй у Расійскай Федэрацыі. Па сутнасці, кампанія бярэ ўдзел у абыходзе санкцый і схемах так званага паралельнага імпарту. Так, напрыклад, ЗША і Японія ў 2023 годзе ўвялі санкцыі на пастаўку шэрагу аўтазапчастак у Расію.

Таксама «Алексвіт лтд» з 2022 года актыўна закупляе маторныя і трансмісійныя алівы ExxonMobile для аўтамабіляў. З імі ў Расіі таксама праблемы.

Схема трэцяя – рээкспарт кветак. Крыніца «Бюро» з кветкавага бізнэсу паведаміла, што ў 2022 годзе фірма «Алексвіт лтд» актыўна займалася рээкспартам кветак у Расію праз індустрыйны парк «Вялікі камень». Нагадаем, схема ўзаконеная беларускімі ўладамі і заснаваная на недаплаце падатку на дададзеную вартасць у беларускі бюджэт для атрымання абранымі кампаніямі звышпрыбытку.

Кампанія не цураецца і стандартных схем па пастаўках кантрафактнай прадукцыі ў Расію – пра гэта паведамляў расійскі рэгулятар «Рассельгаснагляд». У 2023 годзе кампанія ўвезла рыбу невядомага паходжання, але нібыта з Фінляндыі, перапрацавала яе на рыбакансервавым камбінаце «Сталічны», а пасля павезла ў Расію.

Раней Таццяна Аношка працавала ў кампаніі «Глобалкастам», якую лавілі на нелегальных пастаўках адзення і санкцыйных прадуктаў у Расію. Беларускія журналісты таксама расказвалі, як «Глобалкастам» брала ўдзел у шэрай схеме рээкспарту кветак. Так, толькі ў 2019 годзе на імпарт кветак было патрачана 370 млн долараў, а ад іх экспарту паступіла толькі 85 млн долараў. Каля 300 млн долараў згубілася па дарозе з Беларусі ў Расію.

«Глобалкастам» звязаная з правай рукой Аляксандра Лукашэнкі, яго старым паплечнікам Віктарам Шэйманам. У 2020 годзе кампанія спыніла сваю дзейнасць, але ее справа працягвае жыць. І асаблівую ролю ў гэтым бізнэсе займае не толькі Таццяна Аношка, але і ейны муж – Сяргей Аношка, у якога склаліся асаблівыя адносіны з Віктарам Шэйманам. Але пра ўсё па парадку.

ПАЖ ГЕНЕРАЛА

Сяргей Аношка пачынаў сваю кар’еру, як і большасць давераных асобаў Шэймана, у кампаніях бізнэсоўца Аляксандра Мураўёва. З 2003 па 2007 гады Сяргей працаваў у ЗАТ «ГД Ялізава», ЗАТ «Шклозавод Ялізава» і ЗТАА «Еліпак». З 2007 па 2009 гады ён займае кіраўнічыя пасады на «Мотавела». Згадвае яго як дырэктара і Мураўёў у сваім нядаўнім інтэрв’ю:

У 2009 годзе Сяргей Аношка пакідае «Мотавела» і трапляе ў кола давераных асобаў Віктара Шэймана.

Журналісты-расследавальнікі раней расказвалі, як былыя супрацоўнікі Мураўёва, у тым ліку Сяргей Аношка, папоўнілі стройныя шэрагі цяперашняга топ-мэнэджмэнту Віктара Шэймана. «Бюро» пагутарыла на гэтую тэму з крыніцай, знаёмай з Сяргеем Аношкам:

Пад апекай Шэймана Сяргей Аношка пачаў нарошчваць і ўсё болей умацоўваць свае пазіцыі.

Глядзіце, у 2009-м ён афармляецца ў кампанію свайго сваяка «Авангард Грузатранс». І гэтая фірма праз кантактны мэйл звязаная з вядомай шэйманаўскай групай кампаній – «Глобалкастам».

Але доўга ў «Авангардзе» Аношка не засядзеўся, ужо ў жніўні 2010 года ён суправаджае Віктара Шэймана ў замежных паездках. Вось, да прыкладу, фота з Кот-д'Івуара на старонцы Сяргея ў «Аднакласніках».

Сяргей Аношка ў Кот-д'Івуары. Крыніца: профіль Сяргея Аношкі ў сацсетцы «Аднакласнікі»

Згодна са звесткамі «КіберПартызан», у гэты час Аношка лічыўся дарадцай у Адміністрацыі Лукашэнкі.

У 2013 годзе Віктар Шэйман робіцца кіраўніком Упраўлення справамі Лукашэнкі. І ў тым жа годзе следам за ім у гэтую структуру прыходзіць Сяргей Аношка.

З 2015 па 2017 гады Сяргей кіруе ЗТАА «Белавежскія далікатэсы», якое займалася вытворчасцю розных мясных вырабаў. Будучы дырэктарам гэтай кампаніі, ён бярэ ўдзел як сведка ў судовай справе супраць Япрынцавых у 2016 годзе. Аказваецца, менавіта Сяргей Аношка параіў Казбеку Япрынцаву і яго бізнэс-партнёру Аляксандру Арабяну нейкіх украінскіх знаёмых, якія вялі бізнэс у галіне нафтапрадуктаў. З-за невыканання ўмовы гэтых здзелак бацьку і сына Япрынцавых і іх бізнэс-партнёра абвінавацілі ў махлярстве. Суму ўрону ацанілі ў 30 мільёнаў долараў.

Яшчэ адзін інцыдэнт здарыўся з Сяргеем Аношкам у 2015 годзе. У яго дачыненні пачалі крымінальную справу за незаконную куплю і захоўванне патрона. За такое ў Беларусі можна атрымаць да сямі гадоў пазбаўлення волі, але Сяргей, падобна, абышоўся лёгкім спалохам. Нягледзячы на заведзеную крымінальную справу, ён працягваў ездзіць у замежныя камандзіроўкі і, хутчэй за ўсё, справа нават не дайшла да суда.

У 2017 годзе Сяргей Аношка пакідае «Белавежскія далікатэсы». За час яго кіраўніцтва кампанія ні разу не была «плацежаздольнай», і пакідае ён яе з пазыкамі.

Пасля сыходу з «Белавежскіх далікатэсаў» Аношка часова знікаае з бізнэс-радараў. Але ў сакавіку 2021 года зноў з’яўляецца ўжо ў якасці саўладальніка і дырэктара кампаніі ТАА «Апстрым» разам з іншай даверанай асобай Віктара Шэймана – Антонам Новікам. 

У «Апстрыме» Сяргей Аношка замяніў Юлію Брыгадную, сястру другой жонкі Віктара Шэймана. Кампанія займалася прадуктамі нафтаперапрацоўкі і малатанажнай хіміі. Былы дырэктар Павел Лантасаў напісаў у сябе ў Linkedin, што «на піку свайго развіцця кампанія ўваходзіла ў шэрагі найбуйнейшых экспарцёраў Мінска» і пры гэтым «захоўвала сваю непублічнасць і законапаслухмянасць». Але ў лютым 2023 года кампанія пайшла ў ліквідацыю.

Дзякуючы расследавальнікам з Belpol мы ведаем, што ў той жа дзень, калі Сяргей Аношка стаў саўладальнікам «Апстрыма» – 11 сакавіка 2021 года, – ён арганізаваў у Мінску яшчэ адну кампанію – ЗАТ «Вектар Капітал Груп». Разам са звольненым напярэдадні намеснікам Шэймана Андрэем Свірыдавым і былым першым намеснікам Кіраўніцтва справамі Мікалаем Селіванавым.

Belpol прыйшоў да высновы, што гэтая кампанія была створаная пад выглядам прыватнай структуры для абслугоўвання інтарэсаў Лукашэнкі ў абыход санкцый Еўрасаюза.

У жніўні 2021 года Сяргей Аношка, паводле звестак Belpol, стаў выканаўчым дырэктарам Vector Energy Innovation FZCO з зарплатай у 11 тысяч долараў за месяц. Кампанія засвяцілася ў шэрай схеме адабрання і перадачы зямлі ў Сочы, што належала Беларусі, прыватнай кампаніі для забудовы. Каманда Belpol ацэньвае ўгоду ў паўмільярда долараў. У расследаванні гаворыцца, што «Комплекс-Інвест» збіраецца будаваць у Сочы жылы комплекс «Красная Паляна», які будзе ўключаць тры элітныя катэджы плошчай больш як 300 м² кожны, гатэль, сетку рэстаранаў і гаспадарскае шале плошчай 1002 м².

Атрымліваецца, Сяргей Аношка – далёка не апошні чалавек у атачэнні Шэймана. Удвух яны лёталі ў Афрыку, Аношка валодаў фірмай сваячкі Шэймана, а цяпер, паводле дадзеных Belpol, ён працягвае справу свайго патрона – пракручвае розныя шэрыя схемы.

Але вернемся да яго жонкі, якая займае не менш важную пазіцыю ў бізнэсах, звязаных з Віктарам Шэйманам. У прафесійнай біяграфіі Таццяны Аношкі ёсць нямала цікавых фактаў.

СУПРАЦЬ ЛОМА НЯМА ПРЫЁМУ

Таццяна Аношка, у дзявоцтве Грышук, як і яе муж, пачынала кар’еру ў фірмах усё таго ж Аляксандра Мураўёва. Літаральна праз год пасля заканчэння ўніверсітэта Таццяна прыходзіць у групу кампаній АТЕС на пасаду кіраўніка аддзела падаткова-фінансавага кансультавання. У 2005 годзе Таццяна сышла ў «Арыфлэйм». У якасці фінансавага дырэктара яна прапрацавала там да 2012 года.

У той час, калі яе муж Сяргей Аношка ўжо заслужый давер Віктара Шэймана, у ліпені 2011 года Таццяна атрымлівае ў кампаніі «Белферумгруп» пасаду фінансавага дырэктара. Фірма гэта не простая, а з эксклюзіўнымі для бізнэсу правамі, якімі яе надзяліў асабістым указам Лукашэнка. Нароўні з дзяржаўнымі прадпрыемствамі ёй было дазволена займацца зборам, нарыхтоўкай, перапрацоўкай і пастаўкамі лому і адходаў чорных і каляровых металаў.

Як піша сама Таццяна Аношка ў сваім Linkedin, яна ў «Белферумгруп» займалася кансультацыяй уладальніка на стадыі бізнэс-ідэі да абароту больш за 100 мільёнаў долараў. У кампаніі былі філіялы ў Расіі, Украіне і Германіі. Прапрацавала Аношка там да 2016 года. Акрамя Таццяны Аношкі працай у «Белферумгруп» адзначыліся іншыя былыя супрацоўнікі «Мотавела»: Андрэй Феактыстаў і Аляксандр Нікалайчанка, а таксама брат Таццяны Аношкі – Юрый Грышук. Амаль усе яны разам з Аношкай пойдуць працаваць у вядомую нам кампанію «Глобалкастам».

У 2018 годзе «Белферумгруп» абвесцяць банкрутам. Згодна з судовымі дакументамі, яна вінаватая больш як мільён долараў і амаль два мільёны рублёў крэдыторам. Асноўны доўг – перад расійкай кампаніяй «Варонежвторсплаў».

Акрамя сумнеўных сувязяў з міжнароднай сеткай для адмывання горшай мелі месца і падазрэнні з боку Следчага камітэта ў несумленнай ліквідацыі «Белферумгруп».

Падазрэнні да кампаніі з’явяцца ў 2018 годзе падчас расследавання крымінальнай справы, звязанай з ухіленнем ад пагашэння крэдыторскай завінавачанасці кампаніяй «Іствілтрэйд». Згодна з судовым дакументам, атрыманым з украінскага суда, беларускі следчы, які вёў гэтую справу, на падставе дакументаў і паказанняў прыйшоў да высновы, што ў перыяд з 2014 па 2017 гады «пры дапамозе службовых асоб і работнікаў падкантрольнага ім ЗАТ «Цэнтр ліквідацыі прадпрыемстваў» учынены шэраг злачынстваў і іншых супрацьпраўных дзеянняў, звязаных з завалоданнем маёмасці і наўмысным банкруцтвам суб’ектаў гаспадарання, ухіленнем ад пагашэння крэдыторскай завінавачанасці».

Пад падазрэнні трапіла і кампанія «Белферумгруп», якой падчас ліквідацыі таксама кіравала ЗАТ «Цэнтр ліквідацыі прадпрыемстваў». Гэтая ж кампанія займалася ліквідацыяй звязанага з Шэйманам «Глобалкастам-мэнэджмэнта». Крымінальная справа па «Іствілтрэйдзе» была перададзеная ў суд, дзе і была спыненая з-за таго, што выйшаў тэрмін даўнасці. Цэнтр ліквідацыі прадпрыемстваў працягвае працаваць дагэтуль.

Украінскую кампанію – саўладальніцу «Белферумгруп» таксама не абышлі бокам крымінальныя справы. У 2018 годзе кампанія «Шольц Утылізатар АГ» фігуруе ў крымінальнай справе супраць Віктара Януковіча і шэрагу міністраў яго кабінета і супрацоўнікаў падатковай службы Украіны за стварэнне злачыннай арганізацыі з «канвертацыйна-транзітных цэнтраў» пад кантролем падаткавікоў. Кампаніямі неданалічваліся падаткі ў дзяржбюджэт. Украінскія сілавікі налічылі ўрону ад гэтай сеткі дзяржаве больш чым на 100 млрд грыўняў.

У 2023 годзе кампанія «Шольц Утылізатар АГ» аказалася фігурантам яшчэ адной буйной крымінальнай справы аб сетцы кампаній, якія марнавалі дзяржаўныя грошы, ухіляліся ад падаткаў, займаліся легалізацыяй незаконных грошай праз фіктыўныя аперацыі з дапамогай фірм-пракладак. Грошы, атрыманыя па гэтых схемах, пералічвалі на замежныя рахункі, кантраляваныя грамадзянамі Расіі і Беларусі, па фіктыўных імпартных кантрактах.

СЯМЕЙНЫ КАПІТАЛ НА КАНТРАБАНДЗЕ

У 2016 годзе Таццяну Аношку прымаюць у сямейны бізнэс Віктара Шэймана – кампанію «Глобалкастам». Працу там яна сумяшчала з пасадай намесніцы старшыні праўлення ў «групе кампаній» «Алексвіт». Акрамя ўжо згаданай намі «Алексвіт лтд» у гэтым спруце – «ГБК – Шаўковы шлях», «Авангард Грузатранс», «Алексвіт» і «Філігруп». Раскажам пра іх больш падрабязна.

Сама Таццяна Аношка цяпер узначальвае кампанію «ГБК – Шаўковы шлях». Не так даўно мы ўжо расказвалі пра яе сваім чытачам. Кампанія была зарэгістраваная ў 2020 годзе, а ўжо ў 2021-м размясцілася ў свабоднай эканамічнай зоне «Мінск». Гэтая фірма аказалася вельмі прыбытковай – за два апошнія гады яна выплаціла сваім акцыянерам 33,5 мільёна рублёў дывідэндаў. Кампанія з’яўляецца лагістычным хабам, асноўная мэта якога – экспарт мясной прадукцыі і субпрадуктаў у Кітай і краіны Паўднёва-Усходняй Азіі. Напрыклад, курыныя лапкі кампанія закупляе ў тым жа Узбекістане, а потым перапрадае далей у іншыя краіны.

Яшчэ адна кампанія – «Авангард Грузатранс», якой валодае Юрый Грышук, брат Таццяны. Цяпер кампанію ўзначальвае Валянціна Грыб – былая супрацоўніца «Глобалкастама». Акрамя гэтага Валянціна сумяшчае сваю працу ў «Авангард Грузатранс» з пасадай у «Алексвіт лтд», дзе кіруе аперацыйна-лагістычным аддзелам. Цяпер «Авангард Грузатранс» пераарыентаваўся на ўсходні рынак і займаецца кантэйнернымі перавозкамі мяса і субпрадуктаў у Азію.

У 2020 годзе кампанія «Авангард Грузатранс», якой усё яшчэ валодае і якую ўзначальвае брат Таццяны Аношкі, «купіць» у дачкі Віктара Шэймана, Вольгі Шэйман, і яе бізнэс-партнёркі Вольгі Хачатран бар на Зыбіцкай – «Шампанерыю». А пасля «перапрадасць» яе нейкаму Мікіту Андруковічу.

«Алексвіт» і «Філігруп» займаюцца пастаўкамі адзення і кіруюць сеткай крамаў адзення SASCH.

Па сутнасці, тым, чым раней займалася «сетка» «Глобалкастам», цяпер займаецца «група кампаній» «Алексвіт». Ля стырна ўсе тыя ж кіраўнікі і давераныя асобы Віктара Шэймана. Старыя юрыдычныя асобы, якія засвяціліся, былі ліквідаваныя. На іх месца паставілі раней незадзейнічаныя кампаніі, а то і ўвогуле новыя.

Сукупная выручка «групы кампаній» «Алексвіт» у 2023 годзе склала каля мільярда рублёў.

Такім чынам, сямейства Аношак абслугоўвае інтарэсы кампаній, звязаных з Віктарам Шэйманам. Гэтыя фірмы неаднаразова фігуравалі ў скандалах і нават крымінальных справах. Іх падазравалі ў недаплаце падаткаў у беларускі бюджэт, кантрабандзе, абыходзе санкцый, паралельным імпарце. Беручы ўдзел у дзейнасці гэтых кампаній, шлюбная пара Аношкаў скалаціла цэлы капітал. А цяпер давайце больш уважліва паглядзім, на што яны гэты капітал трацяць і куды ідуць грошы, якія павінны былі трапіць у беларускі бюджэт.

Святкаванне Новага года ў дубайскім гатэлі Atlantis The Palm пад спевы Кайлі Міноўг – гэта толькі кропля ў моры. Дарэчы, сям’я Аношкаў і раней наведвала гэтае мепрыемства ў гэтым шыкоўным гатэлі – у 2016 годзе. 31 снежня, у канун новага, 2017-га, года, Таццяна апублікавала фота меню гала-вячэры Atlantis The Palm з подпісам: «Ідзем!» на сваёй старонцы ў фэйсбуку.

Таццяна Аношка ў чаканні гала-вячэры ў гатэлі Atlantis The Palm у Дубаі (снежань 2016 года). Крыніца: профіль Таццяны Аношкі ў Facebook

Дзякуючы «КіберПартызанам» нам удалося высветліць, што Таццяна і Сяргей Аношкі вылецелі з Беларусі 28 снежня 2016 года і вярнуліся з вакацый толькі 4 студзеня ўжо 2017 года. Мяркуючы па фотаздымку з яе ж фэйсбука, муж і жонка Аношкі выправіліся на адпачынак са сваімі трыма сынамі з бізнэс-лаўнджа мінскага аэрапорта.

Таццяна Аношка з сынамі ў бізнэс-лаўнджы Нацыянальнага аэрапорта Мінск (снежань 2016 года). Крыніца: профіль Таццяны Аношкі ў Facebook

І гэта не адзіная паездка ў Дубай.

РАЙСКАЯ НАСАЛОДА

Прааналізаваўшы фотаздымкі і геаметкі ў сацсетках сям’і Аношкаў, мы зафіксавалі, што члены сям’і нашых герояў адзначыліся ў Дубаі сама меней яшчэ 4 разы – у студзені 2024-га, красавіку 2023-га, лютым 2022-га і сакавіку 2021-га. Спынімся на вясновых вакацыях 2021 года і падлічым, колькі Аношкі маглі патраціць на курорце.

30 сакавіка 2021 года Таццяна Аношка апублікавала ў сваім інстаграме фатаграфію з пляжа і з геалакацыяй Atlantis The Palm.

Таццяна Аношка на адпачынку ў Atlantis The Palm у Дубаі (сакавік 2021 года). Крыніца: інстаграм-акаўнт Таццяны Аношкі

Дзякуючы «КіберПартызанам» мы ўсталявалі, што Таццяна Аношка і яе муж Сяргей сапраўды не знаходзіліся ў гэтую дату на радзіме – яны вылецелі з Беларусі 26 сакавіка 2021 года і вярнуліся ў краіну 7 красавіка. Калі дапусціць, што ўсе гэтыя 13 дзён і 12 начэй сямейная пара бавіла ў Atlantis The Palm, то самы бюджэтны нумар (але, тым не менш, з відам на акіян) мог абысціся пары Аношкаў са сняданкам у 8000 €, або каля 650 € за суткі.

Аднак сумы, выдаткаваныя на гала-вячэры з сусветнымі зоркамі і дубайскія гатэлі, – проста слёзы ў параўнанні з тым, колькі сям'я Аношкаў магла спусціць у іншым райскім кутку планеты – у самым сэрцы экватара.

Перанясемся з узбярэжжа Персідскага заліва ў месца яшчэ больш прыцягальнае. Туды, дзе Індыйскі акіян сустракаецца з Аравійскім морам – Мальдывы. У адрозненне ад Дубая, тут не знайсці модных буцікоў і грукатлівых вечарынак. Мальдыўскія выспы па праве сінонім слова эксклюзіў, адпачынак у гэтым райскім месцейку вельмі дарагі і даступны далёка не кожнаму.

Вернемся да інстаграма Таццяны Аношкі. У красавіку 2020 года яна апублікавала серыю фатаграфій з геатэгам – востраў Баа, Мальдывы. У подпісе да здымкаў Таццяна паспяшалася дадаць, што цяпер яна з сям'ёй дома на ізаляцыі, а ў «рай на зямлі» яны паспелі трапіць яшчэ да лакдаўна.

Таццяна Аношка на адпачынку на Мальдывах (снежань 2019 года). Крыніца: інстаграм-акаўнт Таццяны Аношкі

З базы пералётаў, якую атрымалі ад «КіберПартызан», мы даведаліся, што перад самай эпідэміяй COVID-19 сям'я Аношкаў якраз кудысьці рванула з Беларусі 28 снежня 2019 года і вярнулася ў Мінск на Каляды – 7 студзеня ўжо 2020 года. Дзякуючы відэа з паста Таццяны ў нас не застаецца сумневаў – у гэтыя даты яны былі менавіта на Мальдывах. На раскошным курорце сямейства правяло 11 дзён/10 начэй.

У геалакацыі да паста Таццяна не пакінула адзнакі канкрэтнага гатэля, але па апублікаваных ёю фатаграфіях «Бюро» ўстанавіла, што муж і жонка Аношкі з дзецьмі бавілі гэтыя дні ў рэзорт-гатэлі Vakkaru Maldives. Але колькі ўсё гэтае задавальненне каштавала?

Такім чынам, у падарожжа выправіліся мінімум 5 чалавек – яна сама, яе муж Сяргей і трое іх дзяцей. Старшым сынам-блізнятам Іллю і Ігару на той момант было па 12 гадоў, таму паводле правіл гатэля за іх бяруць плату як за дарослых, сыну Марату было 7, і ён афармляецца як дзіця. На жаль, мы не можам праверыць узровень цэн у 2020 годзе, таму задаем усе параметры на аналагічны перыяд, на той выпадак, калі парадак цэн фармуецца зыходзячы з сезоннасці, – з 28 снежня 2024 года па 7 студзеня 2025 года.

Сайт гатэля прапаноўвае па зададзеных параметрах самы танны варыянт – шасцімясцовую рэзідэнцыю з дзвюма спальнямі ў 500 м², уласным басейнам 38 м² і прамым выхадам на пляж. Кошт такой вілы 11 000 $ за суткі, або 110 000 $ за 10 начэй, – сняданак ужо ўключаны ў цану.

Крыніца: vakkarumaldives.com

Аднак гэта яшчэ далёка не ўсе расходы. 

Да гатэля можна дабрацца толькі на гідрасамалёце. Трансфер у абодва бакі можна замовіць у самім рэзорце, але аплачваецца ён дадаткова па тарыфах: 950 $ за дарослага і 475 $ за дзіця – дадаем у выдаткі яшчэ 4275 $ за трансфер.

Мяркуючы па відэа ў інстаграме Таццяны, новы, 2020-ты, год яны сустракалі на пляжнай вечарынцы, якую штогод арганізоўвае гатэль. Папярэднічае канцэртнай праграме і салюту святочная гала-вячэра – падобная на тую, якую Аношкі наведвалі ў Дубаі. Пры браняванні вілы Vakkaru Maldives праінфармавалі, што мерапрыемства не ўваходзіць у кошт пражывання і патрабуе дадатковых фінансавых затрат: 1276 $ за дарослага і 638 $ за дзіця – дадаем у выдаткі яшчэ 5742 $ за навагоднюю паці.

Акрамя таго, Аношкі карысталіся яшчэ адной платнай опцыяй рэзорта – марская прагулка на яхце.

Марская прагулка сям’і Аношкаў на Мальдывах. Крыніца: інстаграм-акаўнт Таццяны Аношкі

Гатэль аказвае гэтую паслугу таксама за асобную плату. Кошт прыватнага чартара стартуе ад 3000 $ за 2 гадзіна марскога падарожжа. За 4 гадзіны давядзецца заплаціць 4500 $, а за 8 – 6000 $. Абед на яхце аплачваецца асобна. Да выніковага кошту гатэль дадасць 10% сэрвіснага збору і 16% ПДВ.

Мы не маем інфармацыі, колькі гадзін на яхце правялі Аношкі і ці перарываліся яны на трапезу. Таму «Бюро» ўзяло на сябе смеласць і ўключыла ў чэк толькі мінімальны кошт арэнды яхты на 2 гадзіны. З усімі падаткамі і зборамі выходзіць 3780 $ – раптам Аношкі гады ў рады вырашылі ўсё ж на нечым зэканоміць.

Ну і, вядома ж, не будзем забываць пра ежу. Бо за 110 000 $ кормяць гасцей толькі сняданкам. На тэрыторыі гатэля месцяцца 7 рэстаранаў. Мы ўзялі сярэднія цэны з Booking. Абед гатэль прапаноўвае па 106 $ за чалавека, а вячэра будзе каштаваць 172 $ за чалавека. Дапусцім, што сям’я Аношкаў абедала і вячэрала ў поўным складзе ўсе гэтыя 10 сутак пражывання. Такім чынам, дадаем да выдаткаў яшчэ 13 900 $ за абеды і вячэры на пяцярых на працягу 11 дзён.

Такім чынам, паводле мінімальных разлікаў, сямейства Аношак магло прагуляць на Мальдывах крыху больш як 137 000 $ за 10 дзён! Каб проста зарабіць такія грошы, звычайнаму беларусу спатрэбіцца 17 гадоў.

БРЫЛЬЯНТАВАЯ МАЯ

Сям'я Аношкаў жыве на шырокую нагу і смеціць грашыма направа-налева не толькі за мяжой, але і ў Беларусі. Вывучаючы профіль Таццяны ў інстаграме, мы выявілі, што наша гераіня на сабе каханай не эканоміць і скупляе ювелірныя ўпрыгажэнні ў прамысловых маштабах.

Пераважна Таццяна Аношка абірае французскі ювелірны дом Van Cleef & Arpels. Вось, напрыклад, бранзалет з малахітам з 18-каратнага жоўтага золата – кошт упрыгажэння 4850 $.

Крыніцы: інстаграм-акаўнт Таццяны Аношкі і vancleefarpels.com

На другім фота мы разгледзелі здвоенае кальцо з той жа калекцыі Magic Alhambra за 7700 $ і кулон на ланцужку за 7000 $.

Крыніцы: інстаграм-акаўнт Таццяны Аношкі і vancleefarpels.com

Амаль такое ж калье ёсць у Таццяны яшчэ і з перламутрам. Яно таннейшае – 2750 $.

Крыніцы: інстаграм-акаўнт Таццяны Аношкі і vancleefarpels.com

І завушніцы – 4050 $.

Крыніцы: інстаграм-акаўнт Таццяны Аношкі і vancleefarpels.com

На яшчэ адным фотаздымку можна разгледзець на яе запясці гадзіннік ад таго ж ювелірнага дома. На еўрапейскай версіі сайта Van Cleef & Arpels такога аксесуара з перламутрам нам знайсці ў продажы цяпер не атрымалася, але дакладна такі ж можна набыць у Саудаўскай Аравіі за 50 з лішнім тысяч саудаўскіх рыалаў. У доларах па курсе яго кошт амаль 13 500 $.

Крыніцы: інстаграм-акаўнт Таццяны Аношкі і amusedco.com

Акрамя таго, у калекцыі Таццяны маюцца завушніцы-матылькі Lucky Alhambra з 18-каратнага золата з перламутрам і тыгравым вокам. Набыць такія можна за 7150 $.

Крыніцы: інстаграм-акаўнт Таццяны Аношкі і vancleefarpels.com

Але на гэтым залатая ліхаманка Аношкі не сканчаецца. У калекцыі нашай гераіні мы знайшлі ювелірныя аздабленні яшчэ аднаго знакамітага брэнда – італьянскага дома мод Bulgari, які праславіўся стварэннем прадметаў раскошы.

Вось, напрыклад, наша гераіня хваліцца ў інстаграме гартэнзіямі, якія яна вырошчвае ў садзе ля свайго дома ў Сеніцы. Кветкі прыгожыя, але, на наш густ, моцна саступаюць кальцу і бранзалету, якія пры святле бліскаўкі асляпляюць ззяннем 18-каратнага ружовага золата ў спалучэнні з перламутрам і оніксам. Агульным лікам на руцэ Аношкі мы налічылі 7250 $ – бранзалет 4350 $ і кальцо 2900 $.

Крыніцы: інстаграм-акаўнт Таццяны Аношкі і bulgari.com

Нават на Мальдывах, удалечыні ад цывілізацыі, на шыі ў Таццяны ланцужок з кулонам з 18-каратнага ружовага золата ад Bulgari. Сам кулон інкруставаны мінералам сердалік і брыльянтамі. За такое ўпрыгажэнне на афіцыйным сайце просяць 4600 $.

Крыніцы: інстаграм-акаўнт Таццяны Аношкі і bulgari.com

А вось, бадай, перліна ювелірнай калекцыі Таццяны – залатыя каралі-змяя, абсыпаныя брыльянтамі. Па сутнасці, на шыі ў гераіні нашага расследавання – аднушка ў Мінску. Бо кошт караляў – 56 000 $!

Крыніцы: інстаграм-акаўнт Таццяны Аношкі і bulgari.com

Акрамя ювелірных аздабленняў Аношка інвестуе ў торбачкі ад люксавых брэндаў. На мюзікл, у якім выступаў яе малодшы сын Марат, Таццяна выбрала торбачку Mini Lady ад французскага дома мод Christian Dior. На афіцыйным сайце за такую просяць 5050 €.

Крыніцы: інстаграм-акаўнт Таццяны Аношкі і dior.com

Для прагулкі па Абу-Дабі выбар трапіў на аксесуар «папрасцей» – маленькую скураную торбачку Kate ад элітнага парыжскага брэнда Saint Laurent. За яе Таццяна Аношка магла выкласці 1550 €.

Крыніцы: інстаграм-акаўнт Таццяны Аношкі і lyst.com

Для пляжнага адпачынку ў Atlantis The Palm у Дубаі наша гераіня выбрала зусім ужо, паводле яе мерак, бюджэтны варыянт. Пластыкавы шопер ад Dolce & Gabbana. Каб насіць крэм для загару з шыкам, Таццяна магла пакінуць у буціку 683 $.

Крыніцы: інстаграм-акаўнт Таццяны Аношкі і thebs.com

Не менш унушальныя сумы муж і жонка Аношкі трацяць і на адзенне. Само сабой – люкс-сегмента.

Вось Таццяна збіралася наведаць праваслаўны храм, паслухмяна пакрыўшы галаву дзвюма беларускімі сярэднімі заработнымі платамі. Дакладней, шалікам Christian Dior за 1210 €.

Крыніцы: інстаграм-акаўнт Таццяны Аношкі і dior.com

А тут сабралася ўся сям’я Аношкаў. На Таццяне сукенка з баваўнянага папліну ад італьянскіх дызайнераў Dolce & Gabbana з капсульнай калекцыі Sunrise вясны 2022 года. На сайце брэнда і іншых профільных анлайн-магазінаў такі строй ужо не набыць, але ў нас усё ж атрымалася адшукаць яго ў продажы ў Саудаўскай Аравіі. Арыгінальная цана без зніжкі – 2200 €.

Крыніцы: інстаграм-акаўнт Таццяны Аношкі і en-saudi.ounass.com

Дарэчы, на сваіх дзецях Аношкі таксама не эканомяць. На малодшым сыне Аношкаў Мараце модная футболка таксама ад Dolce & Gabbana. Такая пакупка магла абысціся амаль у 430 $. На Іллю – футболка прэміяльнага французскага брэнда Louis Vuitton. На афіцыйным сайце такая ж, але ў іншых колерах каштуе 820 €.

Крыніцы: yoox.com і louisvuitton.com

У Іллі Аношкі мы знайшлі яшчэ некалькі дарагіх брэндавых аўтфітаў. Вось, напрыклад, сядзець за школьнай партай хлопчык будзе ў світшоце ад парыжскага дома высокай моды Maison Margiela – 880 $.

Крыніцы: інстаграм-акаўнт школы «Эка-Эл» і maisonmargiela.com

Для прагулак з сябрамі на свежым паветры сын Аношкі, як і ўсе дзеці, апранаецца, вядома, папрасцей (у разуменні гэтай сям’і) – у світшот ад французскага моднага дома Givenchy. Не перажывайце, лагатып пабляк не ад частага мыцця – так было задумана. За 580 €.

Крыніцы: інстаграм-акаўнт Іллі Аношкі і circle-fashion.com

На другога сына, Ігара, бацькі таксама грошай не шкадуюць. У інстаграме хлопчыка мы знайшлі вось такое фота. Строгі гарнітур Ігара падкрэслівае рэмень з залацістай спражкай ад Dolce & Gabbana за 515 $.

Крыніцы: інстаграм-акаўнт Ігара Аношкі і farfetch.com

У ліпені 2023 года Таццяна апублікавала фота з дня нараджэння малодшага сына Марата – хлопчыку спаўнялася 11 год.

Крыніцы: інстаграм-акаўнт Таццяны Аношкі

Урачыстасць праходзіла ў радавым гняздзе Аношкаў у беларускай Сеніцы. Імяніннік на свята апрануўся ў баваўняную кашулю брытанскага брэнда Burberry з летняй калекцыі 2023 года. На афіцыйным сайце такая каштуе 300 $. На блізнюку Іллю Аношку шаўковая кашуля Dior Homme ад прэміяльнага французскага брэнда Christian Dior. Цана пытання – блізка што 1700 $. На блізнюку Ігару Аношку баваўняная кашуля ад італьянскага моднага дома Dolce & Gabbana. Набыць яе можна амаль за 800 €.

Крыніцы: us.burberry.com, cettire.com і dolcegabbana.com

Акрамя таго, на свята да 11-годкі Аношкі запрасілі вядомага блогера-тыктокера Артура Бабіча.

Блогер Артур Бабіч на 11-м дні нараджэння малодшага сына сямейнай пары Аношкаў – Марата. Крыніца: інстаграм-акаўнт Таццяны Аношкі

Пад выглядам патэнцыйных кліентаў мы звязаліся з агенцтвам, якое займаецца арганізацыяй выступаў зорак расійскага шоу-бізнэсу, і ўдакладнілі, у колькі абыдзецца віншаванне Артура Бабіча на дзіцячым свяце з выездам у Мінск. У арганізацыі растлумачылі, што ганарар тыктокера складзе 35 000 $, яшчэ на 8000 $ пацягнуць выдаткі на райдар. Такім чынам, сямейства Аношкаў магло б заплаціць за зорнага госця мінімум 43 000 $.

На дзевяцігоддзе Марата бацькі пестуна таксама «выпісалі» ў Сеніцу куміра сына – блогера, спевака і тэлевядоўцу беларускага паходжання Улада Кабякова.

Блогер Улад Кабякоў на 9-м дні нараджэння малодшага сына Аношкаў – Марата. Крыніца: інстаграм-акаўнт Таццяны Аношкі

«Бюро» под выглядам патэнцыйнага кліента высветліла ў мэнэджара Кабякова, што выступ артыста на дзіцячым свяце ў якасці вядоўцы мерапрыемства і музычнага выканаўцы будзе каштаваць каля 8000 $ за гадзіну.

І нават велікодны стол у доме Таццяны і Сяргея Аношкаў аздабляе пазалочаная парцалянавая качачка ад італьянскага брэнда Ahura.

Залатая качачка на велікодным стале ў маёнтку Аношкаў у Сеніцы. Крыніца: інстаграм-акаўнт Таццяны Аношкі

Такія статуэткі вырабляюцца на фабрыцы ў Італіі пад замову. Мы напісалі на электронную пошту ў аддзел продажу, і вытворца паведаміў нам падрабязнасці: па золаце можна замяніць на плаціну, а каралі і вочы качачкі інкруставаныя стразамі Swarovski. Стаць ганаровым уладальнікам пазалочанай качачкі можна ўсяго за 226 € (цана ў розніцу) і яшчэ 40 € трэба аддаць за дастаўку ў Беларусь. Акрамя таго, нам паабяцалі зрабіць зніжку ў 30% на першую замову.

Акрамя загараднага асабняка ў Сеніцы з пазалочанай качачкай у Таццяны Аношкі ў 2016 годзе ва ўласнасці з'явіўся чырвоны пазадарожнік – BMW X6 2016 года выпуску. Гэтым падарункам наша гераіня сама пахвалілася на сваёй старонцы ў фэйсбуку. Пад фота падарунка яна наракала на чорную паласу: атруцілася, пахавала апошнюю любімую бабулю і нечакана памерлага прыяцеля – і ўсё гэта напярэдадні яе дня нараджэння. Паводле слоў Таццяны, у яе няма маральнага права святкаваць уласныя імяніны. Затое яна можа радавацца новенькаму аўто!

Пазадарожнік BMW X6, які Сяргей Аношка паднёс жонцы ў якасці падарунка на дзень нараджэння. Крыніца: профіль Таццяны Аношкі ў Facebook

Ён, дарэчы, абышоўся Сяргею Аношку ў 2016 годзе прыкладна ў 70 000 $. У нагрузку да пазадарожніка пракладаўся і нумарны знак, замоўлены, верагодна, спецыяльна для Таццяны, – 1010 OT-5. 1010 – супадае з датай нараджэння нашай гераіні – 10 кастрычніка, а ОТ, відаць, расшыфроўваецца як Оношко Татьяна.

У агульнай складанасці мы налічылі ў сям’і Аношкаў адзення і аксесуараў больш як на 130 000 $, з якіх ювелірныя ўпрыгажэнні пацягнулі амаль на 115 000 $. Акрамя таго, мінімум 50 000 $ было патрачана на ганарары і райдары зорных гасцей на сямейных урачыстасцях, і яшчэ сама меней 145 000 $ спусцілі на два адпачынкі: у Дубаі і на Мальдывах. І гэта яўна толькі ніжняя мяжа – тое, што Таццяна Аношка выклала на ўсеагульны агляд у інстаграме, што ў нас атрымалася ідэнтыфікаваць і ацаніць – без уліку кошту авіябілетаў і паўсядзённых адпускных выдаткаў. Але нават так гэта практычна чатырыста тысяч долараў на забавы, прадметы раскошы і падарункі адно аднаму. Рэальны маштаб выдаткаў на матэрыяльныя брэндавыя даброты, адпачынкі і нерухомасць можа быць у разы большы.

Сямейства Аношкаў – кіраўнікі сярэдняга звяна з «абоймы» Віктара Шэймана, але зарабляюць і трацяць столькі, колькі сярэднестатыстычнаму беларусу нават і не снілася. Заробленыя на шэрых схемах, абыходзе санкцый і кантрабандзе казачныя грошы Аношкі трацяць на брыльянтавыя ўпрыгажэнні, брэндавую вопратку, пералёты бізнэс-класам, раскошныя курорты, вячэры з шампанскім і ікрой, ганарары зоркам.

І пакуль у Беларусі сярэдняя налічаная заработная плата каля 600 долараў за месяц, мэнэджары кампаній, звязаных з Шэйманам, трацяць столькі проста на кашулю.

Сяргей Аношка не захацеў з намі пагутарыць.

Таццяна Аношка не адказала на нашыя тэлефанаванні.