Нашыя сацсеткi

З-за сямейных абставін

Нягледзячы на тое што Аляксандр Лукашэнка любіць публічна разважаць пра «сямейныя скрэпы» і культ сям’і, падрабязнасці жыцця ўласнай ячэйкі грамадства ён лічыць за лепшае не афішаваць. Беларусы ўвогуле маюць даволі сціплае ўяўленне пра сям’ю «народнага абранніка» – пастановачныя фота і сухія факты на афіцыйным сайце, вось, бадай, і ўсё, што належыць ведаць электарату.

Аднак «Бюро» высветліла падрабязнасці жыцця старэйшай унучкі Лукашэнкі – Вікторыі: як яна звязаная з бізнэсам «кашалькоў» Лукашэнкі, якія бенефіты атрымоўвае, з якой кампаніі сышла ў дэкрэтны адпачынак і якую пасаду атрымала пасля яго.

Wedding_Victoriya Lukashenka

Вяселле Вікторыі Лукашэнкі. Крыніца: тэлеграм-канал «Пул первого»

Пачатак працоўнага стажу ўнучкі Лукашэнкі датуецца 2018 годам. Цэлы жнівень студэнтка платнага аддзялення факультэта міжнародных адносінаў БДУ адпрацавала ў кампаніі «Арт Хаос», якая валодае аднайменнай мастацкай галерэяй у сталічным шопінг-моле «Dana Mall».

Уладальнікам фірмы ў той перыяд лічылася кіпрская кампанія Danlace Holdings. Яна афіляваная з кампаніяй Dana Holding – ключавым актывам сербскіх бізнэсоўцаў, якіх улады ЗША назвалі «будаўнічымі кашалькамі» Лукашэнкі, Багалюба і Драгаміра Карычаў. А вось абавязкі дырэктаркі галерэі з 2017 года і па сёння выконвае маці Вікторыі – Лілія Лукашэнка.

Дзяўчына, імаверна, праходзіла ў «Арт Хаосе» летнюю практыку і нават атрымала грашовае ўзнагароджанне ў памеры 192 рублёў. З галерэяй у Вікторыі быў яшчэ адзін працоўны дагавор у перыяд з 1 па 31 студзеня 2019 года. За гэты працоўны месяц Лукашэнка атрымала сціплыя 280 рублёў.

У 2020 годзе, на пераддыпломную практыку, Вікторыя накіравалася ў кампанію «Рух спорт менеджмент». Гэтая фірма належала так званаму кашальку Лукашэнкі і па сумяшчальніцтве экс-памочніку бацькі Вікторыі – Аляксандру Зайцаву.

Паводле звестак «Кіберпартызан», з 2007 па 2012 гады Аляксандр Зайцаў быў супрацоўнікам дзяржаўнага сакратарыята Савета бяспекі РБ. Працуючы ў Саўбезе, Зайцаў рэгулярна суправаджаў у замежных паездках члена гэтай структуры – Віктара Лукашэнку.

Даходы старэйшай унучкі Лукашэнкі пачалі расці пасля заканчэння ВНУ, калі яна прайшла навучанне ў IT-акадэміі. Усяго праз тры месяцы Віка атрымала пасаду ў медыцынскай клініцы «кашалька Лукашэнкі» Аляксея Алексіна – «Цэнтры спартыўнай рэабілітацыі НЕО».

«Цэнтр спартыўнай рэабілітацыі НЕО» быў зарэгістраваны ў 2018 годзе Беларускай федэрацыяй біятлона і праз два месяцы перададзены ва ўласнасць беларускай фірме «Неанафта».

З 2006 года кампаніяй валодалі цяпер апальны алігарх Юрый Чыж, некалі ягоны пратэжэ – беларускі «тытунёвы кароль» Аляксей Алексін і яго жонка Іна. У 2016 годзе шлюбная пара Алексіных выйшла са складу ўласнікаў, і «Неанафту» перапісалі на давераных асобаў Алексіна.

50% «Неанафты» трымае Лідзія Ушакова. Яна ў свой час працавала ў нафтатрэйдары бізнэс-партнёра Алексіна па «Брэміна груп» Мікалая Вараб’я – «Інтэрсэрвісе» і лагістычнай кампаніі «Газ Венчурэ», якую звязваюць з самім Алексіным і трэцім суўладальнікам «Брэміна груп» – Аляксандрам Зайцавым. Незадоўга да ўвядзення заходніх санкцый Ушакова стала ўласніцай іншай кампаніі Вараб’я – «БелКазТранс».

Два іншыя суўладальнікі «Неанафты» – Алег Герасім (40%) і Алег Пятроў (10%). Апошні кіраваў алексінаўскай базай адпачынку «Сябры». Алег Герасім – швагер Аляксея Алексіна, жанаты з яго роднай сястрой Святланай.

У 2021 годзе «Неанафта» замовіла рэканструкцыю новага будынка клінікі «НЕО», каля Лячэбнай камісіі ў Ждановічах пад Мінскам, у кампаніі «ТагеР інвест», якая раней пабудавала Алексіну спартова-стралковы комплекс. Гэтую фірму ў 2016 годзе зарэгістравалі Алена Герасім і Павел Татарыцкі.

Алена Герасім – дачка раней згаданага Алега Герасіма і пляменніца алігарха Алексіна. Павел Татарыцкі з 2016 года з’яўляецца дырэктарам будаўнічай кампаніі «Экаво», якая запісаная на ключавыя актывы Алексіна – «Белнафтагаз» (60%) і «Энерга-оіл» (40%).

«Экаво» займалася комплексным кіраваннем будаўніцтва першай чаргі знакамітага «аршанскага афшора» «Брэміна-Орша» ў пасёлку Балбасава і будаўніцтвам транспартна-лагістычных цэнтраў «Брэміна груп» на пагранпераходах «Брузгі» і «Бераставіца».

За 4 месяцы 2020 года «Цэнтр спартыўнай рэабілітацыі НЕО» налічыў Вікторыі Лукашэнцы заработную плату ў памеры 6661 рубля – няблага для маладога спецыяліста, які толькі скончыў універсітэт. У 2021 годзе дзяўчына сумарна зарабіла ў медыцынскім цэнтры яшчэ 15 340 беларускіх рублёў.

14 сакавіка 2022 года Вікторыя, ужо на той момант Дзятлава, афармляе адпачынак па цяжарнасці і родах. А з 18 ліпеня афіцыйна ідзе ў дэкрэт – з гэтай даты медыцынскі цэнтр пачынае маркіраваць кантракт старэйшай унучкі Лукашэнкі кодам «дзеці100».

Вікторыя праседзела ў дэкрэце ўвесь 2023 год, а ўжо ў лютым 2024 года зноў уварвалася ў працоўную каляіну – яна атрымала пасаду другога сакратара ў Міністэрстве замежных спраў Беларусі. На жаль, у нас не атрымалася высветліць узровень яе заробку ў гэтай структуры. Працу ў МЗС унучка Лукашэнкі сумяшчала з пасадай галоўнага спецыяліста аддзела маркетынгу ўсё ў тым жа «Цэнтры спартыўнай рэабілітацыі НЕО».

Падтрымайце нас