Выпускны для сям'і Лукашэнкі
«Музычная медыякампанія», звязаная з нявесткай Аляксандра Лукашэнкі, зарабіла на дзяржаўных тэндарах больш за 700 тысяч рублёў за апошні год.
З чэрвеня 2023 па чэрвень 2024 года прыватная фірма заключыла больш за 30 дамоваў з рознымі дзяржаўнымі ўстановамі. Прычым яна атрымлівала замовы выключна па працэдуры закупкі з адной крыніцы, якая лічыцца больш простым і менш канкурэнтным спосабам выбару пераможцы на таргах.
У чэрвені «Музычная медыякампанія» выйграла тэндар на правядзенне канцэрта для гарадзенскіх выпускнікоў. З гарадскога бюджэту на святочнае мерапрыемства выдзелілі 114 тысяч рублёў. Перад гледачамі выступалі беларускія артысты Тэа і Вольга Рыжыкава, а таксама Лера Бернатовіч і Арцём Скароль – пратэжэ «Музычнай медыякампаніі».
Канцэрт прайшоў 14 чэрвеня ў рамках агульнагарадскога выпускнога, які ў Горадні праводзіўся ўпершыню. Новы фармат быў абраны не выпадкова. Яшчэ ў красавіку гэтага года Аляксандра Лукашэнка запатрабаваў, каб сёлета выпускныя прайшлі сціпла – без лімузінаў і рэстаранаў. І гулянні цэнтралізавана перайшлі пад кантроль мясцовых уладаў. Паездкі на лімузінах замянілі на масавыя парады і шэсці, рэстараны і кафэ – на фуршэты ў школьных спартзалах і нават калідорах.
Такім чынам, новы фармат выпускных прыйшоўся дарэчы і «Музычнай медыякампаніі», якая змагла нядрэнна зарабіць на канцэрце ў Горадні. У цэлым, прадзюсарскі цэнтр рэгулярна пастаўляе сваіх артыстаў на розныя мерапрыемствы па дзяржзамовах.
Напрыклад, за выступ трыа «Ружовыя ружы» на святочным канцэрце да Дня Незалежнасці ў Івацэвіцкім доме культуры прадзюсарскі цэнтр заробіць 4,4 тысячы беларускіх рублёў. Кавер-гурт Cosa Nostra на фестываль у Паставах «Музычная медыякампанія» прадала за 5,5 тысяч рублёў. На выступе абедзвюх груп у Астраўцы на святочным мерапрыемстве, прысвечаным 79-й гадавіне перамогі ў Вялікай Айчыннай вайне, сумарна прадзюсарскі цэнтр зарабіў 11 тысяч беларускіх рублёў.
Аднак, канцэрты – не адзіная крыніца прыбыткаў кампаніі, звязанай з нявесткай Лукашэнкі. Самы буйны кантракт «Музычная медыякампанія» заключыла ў верасні 2023 года з «Другім нацыянальным тэлеканалам» (АНТ). Яго кошт амаль 516 тысяч беларускіх рублёў. Дзяржканал набыў у прыватнай фірмы маёмасныя правы на выкарыстанне абʼектаў інтэлектуальнай уласнасці.
Усё паказвае на тое, што гаворка ідзе аб продажы правоў на новае музычнае шоу «Ранішняя песня». Яго запуск на АНТ у пачатку бягучага тэлесезона анансаваў старшыня праўлення «Другога нацыянальнага тэлеканала» Марат Маркаў.
На сваім youtube-канале «Музычная медыякампанія» адзначае, што праект падрыхтаваны па замове АНТ. Вядучыя музычнай праграмы – салісткі трыа «Ружовыя ружы», якіх прадзюсуе Таццяна Кулакова. У якасці гасцей запрашаюць пераважна артыстаў уласнага прадакшана і спевакоў, з якімі супрацоўнічае Ганна Селук як аўтар.
Гэта не першая калабарацыя «Музычнай медыякампаніі» і АНТ. Пры падтрымцы прафсаюзаў яны ўжо запусцілі музычны праект «Зорны шлях», у рамках якога прадзюсары куюць зорак айчыннай эстрады з супрацоўнікаў дзяржпрадпрыемстваў па ўсёй Беларусі. У дадзены момант скончыліся кастынгі трэцяга сезону шоу.