Зайцаў Аляксандр Мікалаевіч

Нашыя сацсеткi

Сфера дзейнасці Лагістыка, здабыча золата, пастаўкі зброі, гандаль, сельская гаспадарка; дабрачыннасць

Год нараджэння 1976

Месца нараджэння п. Ружаны, Пружанскі раён, Брэсцкая вобласць, Беларусь

Адукацыя Беларускі дзяржаўны эканамічны ўніверсітэт, факультэт менеджменту, спецыяльнасць «эканоміка і кіраванне вытворчасцю»

Звязаныя актывы: «Брэміна груп» (складаванне і захоўванне), «Рузэкспедыцыя» (дзейнасць у галіне перавозак), «Влатэ лагістык» (складаванне і захоўванне), «Аліс ма» (складаванне і захоўванне), «Сохра» (гуртовыя пастаўкі аўтазапчастак і камплектуючых), «Сцісхо» (гуртовы гандаль мясам і мяснымі прадуктамі), «Сцісхо Пінскае» (малочная жывёлагадоўля), «Сцісхо Орша» (вытворчасць прадуктаў з мяса і птушкі), «Юніонвэй» (транспартная апрацоўка грузаў), «Ардзіта» (кандытарская вытворчасць), «Сайбер Джынезіс» (камп’ютарнае праграмаванне), «Лукомльскі кансервавы завод» (перапрацоўка і кансерваванне мяса), «Сонцастаянне» (арганізацыя мерапрыемстваў), «Гандлёвы дом Экспартгандаль» (гуртовы гандаль), «Глаўгандальпрэд» (агенцкія паслугі ў гуртовым гандлі), «Лакшэры мотарс» (гандаль легкавымі і грузавымі аўтамабілямі), Хакейны клуб «Бастыён» (спорт), «Белгрыт-кварц» (мінеральна-сыравінная вытворчасць), «Белгрыт АМУ» (здабыча торфу), «Тэмо» (вытворчасць шкляных вырабаў), «ЗахадТрансМяжа» (транспартная апрацоўка грузаў), «Рух дэвелапмент»/«Рух спорт клуб» (стварэнне рэкламы), Sohra Overseas FZE (ААЭ), Sohra Mining DMCC (ААЭ).

Гістарычныя актывы: «СМ Індастрыял Інжынірынг» (дзейнасць у галіне архітэктуры), «Кайрас спорт» (гандаль адзеннем), «ЗСПЗ Арсенал» (гандаль нехарчовымі таварамі), «БСЗТ – Новыя тэхналогіі»/«Кідма тэк» (навуковыя даследаванні і распрацоўкі), «Велес-міт» (вытворчасць прадуктаў з мяса і птушкі), «Шэйнкер груп» (агенцкія паслугі ў гуртовым гандлі), «Каліта спец»/«Касмічнае агенцтва Белкосмас»/«Трэндхол» (гандаль адзеннем), «ЕўраФармІнтэграцыя» (гандаль фармацэўтычнымі таварамі), «Еуропіан Грын Эсэтс» (гандаль фармацэўтычнымі таварамі), «Ірыдыо» (вытворчасць прамысловай вентыляцыі), «Белгрыт-Палессе» (здабыча аграхімічнай сыравіны), «Рух спорт менеджмент» (дзейнасць спартовых клубаў).

Сувязі: Віктар Лукашэнка (заступнік, партнёр), Аляксей Алексін (бізнэс-партнёр), Мікалай Варабей (бізнэс-партнёр), Раман Зайцаў (сын, бізнэс-партнёр), Віталіе Буздуган (бізнэс-партнёр), Ігар Рачкоўскі (бізнэс-партнёр), Яна Леванеўская (менеджарка), Ігар Лашук (духоўны настаўнік, сябар, менеджар), Васіль Дземянцей (менеджар), Андрэй Чырко (менеджар), Яўген Крахоцін (былы менеджар).

Бенефіты: Дзякуючы блізкасці да Віктара Лукашэнкі Аляксандр Зайцаў стаў адным з самых уплывовых беларускіх бізнэсоўцаў. У канцы 90-х займаў кіраўнічую пасаду ў Міністэрстве эканомікі РБ. З 2003 па 2007 гады працаваў у Саўміне. З 2007-га па 2012-ты – у дзяржсакратарыяце Савета бяспекі, памочнік Віктара Лукашэнкі. Публічна Зайцаў адмаўляе факт працы на Віктара Лукашэнку.

Абрастаючы сувязямі і заручыўшыся падтрымкай свайго заступніка, Зайцаў ідзе ў бізнэс пад кантролем дзяржавы. У 2013-м, разам з Мікалаем Вараб’ём (у 2014 годзе сярод саўладальнікаў з’явіўся і Аляксей Алексін) ён засноўвае кампанію «Брэміна груп», якая пазней атрымае выключныя падатковыя і мытныя льготы і, паводле ацэнак журналістаў-расследавальнікаў, стане адным з галоўных лагістычных кантрабандных хабаў у краіне. Звязаныя кампаніі таксама фактычна атрымалі манапольнае права зарабляць на транзіце, пасля таго як дзяржава дазволіла ім пабудаваць два транспартна-лагістычныя цэнтры з правам мытнага афармлення на пагранпераходах паміж Беларуссю і ЕС – Брузгі і Бераставіца.

У 2014 годзе Аляксандр Зайцаў зарэгістраваў групу «Сохра» з офісамі ў Мінску і пазней у Дубаі для экспарту цяжкай тэхнікі (МАЗ, МТЗ, БелАЗ). Выкарыстоўваючы нефармальны статус і сувязі на Блізкім Усходзе, Зайцаў наладзіў кантакты з мясцовымі элітамі. У 2017 годзе Sohra Overseas увайшла ў капітал «БСЗТ – Новыя тэхналогіі», пасля чаго дубайскі офіс ператварыўся ў вузел для паставак тэхнікі, а таксама будаўнічай і сельскагаспадарчай прадукцыі ў Азію і Афрыку. У 2018-м – пасля візіту Аляксандра Лукашэнкі ў Судан – з’явілася даччыная Sohra Mining.

Пад уплывам санкцый і цяжкасцяў у знешнегандлёвых праектах Аляксандр Зайцаў пераарыентаваў бізнэс на ўнутраны рынак: у 2020–2022 гадах звязаныя з ім структуры («Сохра» і «Сцісхо») пачалі скупку дэпрэсіўных аграактываў. Гэтую сыравінную базу Зайцаў папоўніў кандытарскай фабрыкай «Ардзіта», якая занялася выпускам бісквітнага печыва Zaleepie (choco pie), і Лукомльскім кансервавым заводам па перапрацоўцы рыбнай прадукцыі.

Паралельна Зайцаў інвестуе ў свой імідж каталіцкага мецэната. Ключавую ролю тут іграе яго духоўны настаўнік і менеджар – ксёндз Ігар Лашук, праз якога, паводле дадзеных расследаванняў, накіроўваюцца сотні тысяч долараў на каталіцкія ініцыятывы; атрыманы статус мецэната і тытул рыцара ордэна Святога Грыгорыя Вялікага не дапамаглі Зайцаву аспрэчыць санкцыі ЕС у судах.

Для кіравання актывамі ў абыход санкцый Зайцаў абапіраецца на вузкае кола давераных асобаў, у тым ліку высокапастаўленых сілавікоў, а ключавыя кірункі развівае ў партнёрстве з сынам Раманам Зайцавым.

Абмежаванні: Аляксандр Зайцаў знаходзіцца пад персанальнымі санкцыямі ЕС з 2021 года і ЗША – з 2022 года. Пад абмежаванні падпалі і яго асноўныя актывы: «Брэміна груп», галаўная група «Сохра» з дубайскай Sohra Overseas FZE, а таксама абаронная кампанія «БСЗТ – Новыя тэхналогіі» («Кідма тэк»). З 2024 года «Рузэкспедыцыя» і «Влатэ лагістык» знаходзяцца пад санкцыямі ЕС і ЗША.